Dem Jean Schoos säin drëtte Krimi Déidlech Ofgrënn aus der Serie „Gudde Gendaarm, Béise Gendaarm“ spillt am Joer 1973. Wéi gewinnt huet den Auteur am Virfeld vill iwwert déi historesch Realitéiten zu Lëtzebuerg recherchéiert, a léisst esou eng spannend Mëschung aus Fakten a Fiktioun a seng Geschicht afléissen. De Chef vun der Brigade Rued-Sir gëtt dout opfonnt. En Deel vu senger Hirschuel hänkt un der Tapéit vum Büro. Säi Kolleg Turpel huet sech an de Koma gesoff. Den Zesummenhang? Eng säit drësseg Joer geheim gehale Krichsvergaangenheet mat fatale Folgen. Wien huet den Ofzuch gedréckt? Dat muss dem Kapitän Fischbach seng Equipe elo rausfannen. Schnell muss de Fischbach awer feststellen, dass net alles sou leeft wéi et soll. Hu Leit aus sengen eegene Reien eppes mat dëser Affär ze dinn? Wiem kann hien sech mat sengen Iwwerleeungen nach uvertrauen? Dem Jean Schoos seng Serie „Gudde Gendaarm, Béise Gendaarm“ beweegt sech an de siechzeger, siwwenzeger Joren a behandelt d'Entwécklung vum Enquêteur Fischbach. Um Ufank nach 2te Mann an der Sûreté, ass hien elo zum Kapitän avancéiert a muss sech méi a méi mat administrativen Aarbechte beschäftegen a mat deem wat derhannert stécht. Et gëllt d'Gesiicht vun der Gendarmerie am richtege Liicht ze behalen, an dem Fischbach gëtt ëmmer méi bewosst, wat en dofir a Kaf muss huelen.