Einu sinni var fátækur viðarhöggsmaður sem átti einn son. Viðarhöggsmaðurinn átti sér þá ósk að pilturinn fengi góða og þarfa menntun svo hann gæti séð fyrir föður sínum í ellinni. Pilturinn fer í menntaskóla en tekst ekki að ljúka námi vegna fjárskorts og snýr því heim aftur. Dag einn þegar feðgarnir eru úti í skógi að höggva eldivið, ráfar pilturinn lengra inn í skóginn. Undir stóru eikartré finnur hann litla glerflösku og inni í flöskunni er skrýtið kvikyndi sem talar. Kvikyndið, sem líkist froski, biður piltinn um að hjálpa sér út úr flöskunni. Þegar pilturinn tekur tappann úr flöskunni flýgur upp úr henni undarleg vera og ekki var hún frýnileg. Nú var úr vöndu að ráða fyrir piltinn sem mátti beita kænsku sinni og visku til að skáka púkanum sem kom upp úr flöskunni.Ævintýri Grimmsbræðra eru löngu orðin þekkt um allan heim enda verið þýdd á fleiri hundruð tungumál. Þjóðsögur Grimmsbræðra hafa tekið töluverðum breytingum í aldanna rás án þess þó að missa upprunalegan boðskap sinn og í dag ganga þjóðsögur Jacobs og Wilhelms einfaldlega undir nafninu Ævintýri Grimmsbræðra.