Í ævintýrinu um Spunakonurnar kynnumst við stúlku einni sem er svo löt að hún nennir engu, ekki einu sinni að spinna ull. Dag einn reiðist móðir hennar óskaplega yfir letinni og slær hana utanundir. Stúlkan fer að gráta og í sömu andrá ber drottninguna að garði. Móðirin skammast sín fyrir leti dóttur sinnar og lýgur að drottningunni og segir stúlkuna svo leiða yfir því að hafa ekki ull til að spinna, því hún elski að spinna ull. Drottningin tekur stúlkuna að sér og býður henni að giftast elsta syni sínum ef henni takist að spinna úr allri ullinni sem hún geymir í höllinni. Nú voru góð ráð dýr. Stúlkan kemur sér ekki að verki en fær aðstoð úr óvæntri átt. Ævintýri Grimmsbræðra eru löngu orðin þekkt um allan heim enda verið þýdd á fleiri hundruð tungumál. Þjóðsögur Grimmsbræðra hafa tekið töluverðum breytingum í aldanna rás án þess þó að missa upprunalegan boðskap sinn og í dag ganga þjóðsögur Jacobs og Wilhelms einfaldlega undir nafninu Ævintýri Grimmsbræðra.